۹ی خەزەڵوەری ساڵی ۱۳۹۹ ھەتاوی
آموزش وردپرس

کوژران و برینداربوونی ۳۳ کۆڵبەر، دەسبەسەرکردنی ۹۷ کەس و خۆکوشتنی ۳۵ کەس

ڕاپۆرتی پێشێلکرانی مافی مرۆڤ لە کوردستان لە ڕەزبەری ئەمساڵ‌دا

(کوژران و برینداربوونی ۳۳ کۆڵبەر، دەسبەسەرکردنی ۹۷ کەس و خۆکوشتنی ۳۵ کەس)

 

لە ماوەی مانگی رەزبەری ئەمسا‌ڵدا هەر نەبێ ۱۷۲ حاڵەتی زبری پێشێلکردنی مافی مرۆڤ لە ڕۆژهەڵاتی کوردستان ڕووی داوە کە ناوەندی مافی مرۆڤ بۆ ڕۆژهەڵاتی کوردستان تۆماری کردوون.

به‌ پێی بانکی زانیاریی ناوه‌ندی مافی مرۆڤ بۆ ڕۆژهەڵاتی کوردستان لەم مانگەدا‌ لانیکەم ۳۳ کۆڵبەر و کاسبکاری کورد بە تەقەی ڕاستەوخۆ، یان بەربوونەوە لە شاخ بەهۆی ڕاوه‌دوونانی هێزه‌ چه‌کداره‌کانی کۆماری ئیسلامی کوژراون و بریندار بوون. لەو ۳۳ کاسبکارە ۲۸ کەسیان بریندار بوون و ۵ کۆڵبەریش کوژراون و گیانیان لە دەست داوە.

کوژران و برینداربوونی ۳۳ کۆڵبەر و کاسبکاری کورد لە مانگی ڕەزبەر لە حالێکدایە کە لە سێ مانگی هاوین ۶۶ و لە وەرزی بەهاریش‌دا ۵۶ کۆڵبەر و کاسبکار لە پێناو پارووە نانێکدا کوژرابوون و بریندار بوون. بەوەش ژمارەی ئەو کەسانەی لە سەرەتای ئەمساڵەوە تا ئێستا کوژراون و بریندار بوون گەیشتۆتە ۱۵۵ کەس.

شایانی باسە کە پارەکەش لانیکەم ۲۴۲ کۆڵبەر و کاسبکاری کورد لە ناوچە سنوورییەکان بە هۆکاری سروشتیی وەک ڕەقهەڵاتن لە سەرما و هۆکاری ناسروشتیی تەقەی هێزە چەکدارەکانی ڕێژیم کوژرابوون و بریندار ببوون.

لە مانگی ڕەزبەری ئەم ساڵدا هەروەها ۹ زیندانیی کورد ئێعدام کراون. دەزگای قەزایی ڕێژیم لە سێ مانگی یەکەمی ئەمساڵدا ۷ زیندانی و لە سێ مانگی هاوینیش‌دا ۱۴ بەندیی کوردی لە دار دابوو و بەوەش ژمارەی ئەم کەسانەی لە سەرەتای ئەمساڵەوە تا ئێستا لە زیندانەکاندا ئێعدام کراون گەیشتە ۳۰ کەس. دەزگای قەزایی ڕێژیمی کۆماری ئیسلامی لە ساڵی ڕابردووشدا لانیکەم لانیکەم ۴۹ بەندیی کوردی لە زیندانەکانی ئێراندا ئیعدام کردبوو.

لە پێوەندی لەگەڵ گرتن و بەندکراندا، لە ماوەی مانگی ڕەزبەردا لانیکەم ۹۷ کەس بە تۆمەتی چالاکیی ئەمنیەتی دژی کۆماری ئیسلامی و ئەندامەتی یان هاوکاریکردنی حیزبێکی کوردیی دژبەری کۆماری ئیسلامی گیراون. لە وەرزی بەهاری ئەمساڵیشدا لانیکەم ۱۰۶ کەس و لە وەرزی هاوینیش‌دا ۲۱۶ کەس بە تۆمەتی چالاکیی ئەمنیەتی لە دژی ڕێژیم گیرابوون و بەوەش ژمارەی ئەم کەسانەی لە سەرەتای ئەمساڵەوە تا ئێستا گیراون، گەیشتە ۴۱۹ کەس کە نیزیک بە ۸۰ کەس لەوان بەتاوانی ناڕەزایەتی دەربڕین بە هێرشی تورکیە بۆ سەر ڕۆژاوای کوردستان دەسبەسەر و زیندانی کراون. جێی بیرهێنانەوەیە کە لە ساڵی ڕابردووشدا ۶۴۱ کەس لە خەڵکی ئاسایی و چالاکانی مەدەنی و سیاسی لەلایەن دەزگا ئەمنیەتییەکانەوە بەتۆمەتی چالاکیی ئەمنیەتی و سیاسی لە دژی کۆماری ئیسلامی و بەرژەوەندییەکانی ئەو ڕێژیمە گیرابوون.

خۆکوژی، هەر وەکوو ڕابردوو دیاردەی تڕاژیدیکی کوردستان بوو. لە مانگی ڕەزبەری ئەمساڵدا لانیکەم زیاتر لە ۳۵ کەس خۆیان کوشتوە کە ناوەندی مافی مرۆڤی ڕۆژهەڵاتی کوردستان شوناسی ۲۱ کەس لەوانی ئاشکرا کردوە. لە وەرزی بەهاریش‌دا ئەوەندەی ناوەندی مافی مرۆڤی ڕۆژهەڵاتی کوردستان تۆماری کردبوو، ۷۲ کەس و لە وەرزی هاوینیش‌دا ۸۷ لە کوردستان خۆیان کوشتبوو و بەوەش ژمارەی ئەم کەسانەی لە سەرەتای ئەمساڵەوە تا ئێستا خۆیان کوشتوە و ناو و نیشانیان تۆمار کراوە، گەیشتە ۱۸۰ کەس. لە ساڵی ڕابردووشدا لانیکەم ۱۷۰ کەس لەو سەدان کەسەی هەوڵی خۆکوشتنیان دابوو، بەداخەوە هەوڵەکانیان سەرکەوتوو ببوو کە ۶۲ کەسیان پیاو و ۱۰۸ کەسیان ژن بوون.

جێی باسە ئەو ئامار و زانیارییانەی ناوەندی مافی مرۆڤ بۆ ڕۆژهەڵاتی کوردستان لەسەر پێشێلکردنی مافی مرۆڤ لە  کوردستانی ئێران بڵاوی کردۆتەوە تەنیا ئەو بەشە لەو حاڵەتانە دەگرێتەوە کە هەواڵ و زانیارییەکان بە ئاشکرا بەمیدیایی کراون و لە لایەن سەرچاوە باوەڕپێکراوەکانەوە ئاماژەیان دراوەتێ، ئەگینا ئەو ناوەندە پێی وایە کە ئاماری ورد و درووستی پێشێلکاریی مافی مرۆڤ لە کوردستان بەهۆی کۆماری ئیسلامیی ئێران زۆر زیاتر لەو ئامارەیە کە ده‌خرێته‌ به‌رچاو.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *